1
Me har utvikla eit eige IK system for handtering av Kvalitet og HMS. I dette systemet vert det registrert forbetringsmoglegheiter, avvik og hendingar samt risikoar i drifta. Kvalitetssystemet gjeld for, og er tilgjengeleg for alle faste og midlertidige tilsette i konsernet. I tillegg pliktar alle underleverandørar som arbeidar på våre anlegg å setja seg inn i og følgje våre HMS-reglar. Systemet dekker alle krav som kjem frå lovar og forskrifter angåande IK system. Samtidig er det viktig for oss i Eide at dette systemet lever, og at alle tilsette er aktive deltakarar inn i systemet.
Eide Fjordbruk har som visjon å setje standarden for framtidas havbruk. Dette gjeld også for internkontroll og risikostyring. Me har komplekse aktivitetar som inneheld mange forskjellige risikomoment. Dette være seg HMS, rømming av fisk, fiskevelferd, utslepp til ytre miljø, omdømme osv. Alle aktivitetar me gjer skal risikostyrast, og alle tilsette er ansvarlege for å bidra inn mot dette arbeidet som best mogleg.
For å sikre at me klarer å fange opp alle dei forskjellige risikomomenta har me utarbeida eigne rutinar for heilskapleg risikostyring. Her er det fokus på brei deltaking frå alle tilsette som vert treffe av risikoane. I tillegg set me saman tverrfaglege team for å sikre at me dekker dei viktigaste fagfelta. I utarbeidinga av rutinane har me nytta standardar som NS 5814:2021 Krav til risikovurderingar og NS-ISO 31 000:2018, Risikostyring retningslinjer. Me har også stor fokus på kontinuerleg forbetring i alt me gjer. Avvik er ein viktig faktor inn i dette arbeidet, og me nyttar avvik aktivt inn i risikostyringsprosessen.
Våre tilsette gjennomfører førstehjelpskurs, kurs i rømmingssikring og kurs i bruk av sikringsradio. I tillegg deltek dei i beredskapsøvingar og HMS-gjennomgangar ute på lokasjon. Våre verneombod gjennomfører i tillegg eit utvida obligatorisk HMS-kurs. Me har eigne verneombod for kvar region som me har jamlege vernerundar saman med. Me har òg månadleg møte mellom leiinga og verneomboda der me tek opp saker som omhandlar HMS. Dette er eit viktig forum for å få til ein konstruktiv dialog mellom verneomboda og leiinga.
Kompetansestyring vert gjennomført via ei eiga kompetansematrise slik at me til ei kvar tid har kontroll på kompetansen i selskapet.
Alle tilsette er dekka av offentlege helsetenester i Norge, som tilbyr høgkvalitets tenester for heile befolkninga. Alle tilsette er òg dekka av lovpålagt yrkesskadeforsikring. Utover dette er faste tilsette dekka av ei ekstra helseforsikring, samt utvida yrkesskade- og ulykkesforsikring.
Alle våre tilsette har tilbod om kiropraktorbehandling for å førebyggje belastningsskadar. Deltaking er frivillig, gratis og gjennomførast i arbeidstida.
Me har ei sterkt fokus på å ha det kjekt i lag og har tradisjon for å samlast i lag til sommarfest og julebord.
Selskapa i konsernet er tilknytt bedriftshelseteneste som òg rådgjev i saker som omhandlar HMS. Alle våre faste tilsette får tilbod om fri årleg helsesjekk og bedriftshelsetenesta gjennomfører i tillegg ein årleg statusrapport knytt til yrkesfagleg
helse. Her vert mellom anna eksponering mot støv, kjemikaliar, vibrasjon, støy og fysisk belasting kartlagt. Målet med helsekontrollen er å gje tilsette status på eiga helse og tidleg varsel eller førebygging av alvorleg sjukdom. Dei tilsette har anledning til å gjennomføre undersøkinga i si arbeidstid, og arbeidsgjevar sender ut innkalling og informasjon om helseundersøkinga årleg. Resultata frå helseundersøkingane er konfidensielle mellom lege og tilsett, men me mottek aggregerte data.
Me har i 2022 ikkje hatt nokon dødsfall eller yrkesskadar med varige eller alvorlege skadar. Me hadde heller ingen slike tilfelle i 2021. Me har hatt ei arbeidsrelaterte skade i 2022, ei nedgang frå åtte slike i 2021. Dette utgjer to tilfelle per 200 000 timar arbeida, mot 15,3 per 200 000 timar i 2021.
Skaden som er registrert var med innleigde tilsette eller underleverandørar i 2022. I 2021 hadde me òg ei hending der ein underleverandør som gjennomførte dykkararbeid hjå oss hadde ei hending med potensiale for alvorleg skade. Alle skadar og hendingar vert følgt opp og behandla i vårt HMS-styringssystem.
Sjukefråværet i 2022 var på 3,5%, ei auke frå 3% i 2021. Endringar er innanfor normale fluktuasjonar og me har ikkje identifisert nokon spesifikke årsaker.
2
Ein trygg arbeidsplass er òg ein arbeidsplass der ein trivst og føler seg sett og inkludert. For å oppnå dette trur me at det er viktig at me har det gøy saman. Nettopp viktigheita av å ha det gøy saman er noko me er opptekne av og som me måler årleg i vår medarbeidarundersøking (skala frå 1-5, der 5 er beste score). I 2022 scora me 4,4 på denne KPI-en, mot målet vårt på 4,0 og 4,2 i 2021.
Eide diskriminerer ikkje, korkje basert på kjønn, hudfarge, religion eller seksuell legning. Me har fokus på likestilling og mangfald i tilsetjing av lærlingar og i rekrutteringsføremål. Det er ikkje avdekka tilfelle av diskriminering i 2022.
Konsernet har stort mangfald på arbeidsplassen, med tilsette frå Sverige, Tyskland, Litauen, Malaysia og Syria i tillegg til våre norske tilsette som utgjer fleirtalet av dei tilsette. Dei tilsette er i all hovudsak busett i nærmiljøa der me driv verksemda vår. Alle våre tilsette er busette i og arbeidar i Noreg.
Me hadde ved utgangen av året 77 tilsette, av desse er 68 fast tilsette. I tillegg har me ni tilsette i midlertidig stilling, av desse er fem lærlingar. Det aller meste av våre aktivitetar vert utførte av våre eigne tilsette og me har ikkje store sesongvariasjonar i arbeidet. I samband med ferieavvikling for våre tilsette og i samband med enkelte arbeidsoperasjonar nyttar me oss av sommarhjelpar og ringevikarar. Sidan desse vikarane ikkje er tilsette ved årsslutt inngår ikkje desse i det rapporterte talet på tilsette. Totalt var 16 vikarar aktive i 2022. 14 av våre tilsette er kvinner og kvinneandelen i konsernet er på 18 % av alle tilsette (16% i 2021). Styrets leiar i konsernet er kvinne.
Gjennomsnittleg lønnsnivå for alle kvinner i bedrifta er på 96 % av lønnsnivået for alle menn (gjennomsnitt for alle stillingskategoriar). Hovudårsaka til forskjellen er at me har ein høgare kvinnedel blant våre læringar enn blant andre tilsette. Lønna til individet i konsernet med høgast samla godtgjersle var på 3x medianløna.
Årlege lønnsjusteringar vert fastsett av dagleg leiar i samråd med styret og leiinga. Konsernet nyttar i all hovudsak fast og timesbasert løn, og har i svært liten grad variabel løn, heller ikkje blant våre leiarar. Alle dei fast tilsette har same bonusordning og årleg bonus vært fastsett ved skjønn av styret basert på årets resultat i konsernet.
3
Lokale tilbod er viktig for å sikre levande bygder, og i Eide står idrettsmentaliteten og konkurranseinstinktet sterkt. Me er difor stolt sponsor av ei rekkje lokale idrettslag, foreiningar og kulturtilbod i nærområda det me driv verksemda vår. Vinteridrett
generelt og skiskyting spesielt har ein spesiell plass i Hålandsdalen og i Eide familien. Difor er me òg stolt sponsor for det lokale skiskyttartalentet Martin Femsteinevik. Martin har fleire gongar vunne Norgescup for menn senior. Me har òg hatt eit godt samarbeid med ein av verdas fremste idrettsutøvarar, skiskyttaren Marte Olsbu Røiseland.
Sterke bygdesamfunn treng òg eit aktivt lokalt næringsliv. Tilgang på lokale bedrifter med høg kompetanse og kort reiseveg og responstid til anlegga våre er viktig for oss. Eide handlar derfor bevisst mykje av det verksemda treng frå lokale og regionale aktørar. Både nøter, merdar, båtar, arbeidsklede, dykke- og ROV tenester, fraktetenester og slaktetenester vert leverte av lokale selskap i regionen.
Sidan anlegga våre ligg ute i distrikta og me er avhengige av tilgang på høgt kvalifisert personell frå desse områda fokuserer me på å bidra til utdanning. Eide er ein viktig arbeidsgivar i mange lokalsamfunn og ei godkjend læreverksemd både i akvakulturfaget og automasjonsfaget.
Me har til ei kvar tid om lag seks lærlingar blant dei tilsette. Verksemda har og eit tett samarbeid med Fusa Vidaregåande skule si akvakulturlinje om både lærlingar, TAF-lærlingar og utplassering av skuleelevar gjennom året.
Me er sikre på at ei av løysingane for å produsere nok mat til framtidige generasjonar ligg i havet, så eit viktig fokusområde for oss er å bidra til faktabasert kunnskap om berekraftig havbruk. Dette er ein viktig inspirasjon bak vårt visningssenter Salmon Eye, som du kan lese meir om på dei neste sidene.
4
Fokus på mattryggleik er avgjerande for oss. All fisken vår er sertifisert etter Global GAP-standarden og me leverer berre fisk til godkjente prosess- og foredlingsanlegg underlagt strenge kontrollar av det norske mattilsynet. Desse anlegga har òg tredjeparts-sertifiseringar knytt til mattryggleik som BRC og HACCP for å ivareta, avdekkje og førebyggje risikoar knytt til produksjon av mat.
Me har i tillegg implementert eigne retningsliner for å sikre trygge råvarer og produkt i vårt kvalitetsstyringssystem. Me har ikkje hatt nokon negative hendingar knytt til mattryggleik det siste året, og ingen av våre produkt har vorte tilbakekald. Me har eigen samfunnskontakt og som har kontinuerleg dialog med ulike interessentar, og eigen mattryggleikansvarleg som har ansvar for dialog med våre kundar og leverandørar rundt mattryggleik.
Det norske Helsedirektoratet anbefaler i dag å ete fisk til middag to til tre gonger per veke, og at minimum eit av desse måltida er feit fisk som for eksempel laks eller aure. Laks og aure er ei lettfordøyeleg proteinkjelde. Den er rik på omega-3-fettsyrer, protein og feittløyselege vitamin som vitamin D, selen, vitamin B12, vitamin A, jod og antioksidantar. Norsk laks er i tillegg naturleg fri for Anisakis (på norsk «kveis» eller rundorm), noko som gjer at det er ein av få fiskar som kan etast rå utan å måtte frysast eller varmebehandlast først.
Oppdrettslaks inneheld noko mindre Omega-3 enn vill laksefisk på grunn av planteingrediensar i fôret, men er framleis ei særs god kjelde til Omega-3. Til gjengjeld gjer dei same ingrediensane at oppdrettslaks inneheld mindre miljøgift enn ein tilsvarande vill fisk, sidan miljøgift i all hovudsak kjem frå dei marine ingrediensane som vert akkumulerte i villfisken når dei et annan villfisk.
I vårt fôr nyttar me fiskeolje som er reinsa for miljøgift (dioksinar), noko som gjer at vår fisk kan få meir marine råvarer i dietten som igjen gjer meir Omega-3, utan at den inneheld meir miljøgift. Ja takk, begge deler!
Når du et ein laks frå Eide kan du i tillegg være trygg på at fisken aldri har vore behandla med antibiotika, tilsett hormon eller genmodifiserte ingrediensar.
5
A vision below the surface...
Debatten om havbruksnæringa sin påverknad på miljøet rundt anlegga og på vill laksefisk og andre artar, er stadig i mediebilete. I tillegg til den lokale påverknaden næringa vår har, vert den globale miljø- og klimadebatten, med fokus på både dramatiske endringar og berekraftig matproduksjon, òg stadig meir aktuell. Debatten er kompleks, den følger politiske skiljelinjer, er i nokre tilfelle prega av populisme, ideologiske og økonomiske preferansar og interesser. Faktabasert kunnskap brynast mot myter, synsing og feilinformasjon.
Eide vil med sitt visningsanlegg Salmon Eye i Rosendal bidra til faktabasert kunnskap, og setje lokale utfordringar, løysingar og innovasjonar i eit globalt perspektiv, med særleg fokus på dei miljømessige sidene av havbruket. Senteret skal vera fagleg uavhengig av Eide og skal bidra til å styrke kunnskapen om akvakultur hjå publikum. Den faglege uavhengigheta sikrar me ved at det faglege innhaldet vert kvalitetssikra av ei faggruppe med uavhengige ekspertar.
I faggruppa inngår:
• Friede Andersen
• Jostein Bakke
• Konrad Sekkingstad
• Kenneth Bruvik
• Linda Nøstbakken
• Øystein Skaala
Frå kaien i Rosendal tek dei besøkjande plass i dei heilelektriske båtane Malm og Melder, som fraktar ein lydlaust gjennom vatnet på den korte turen ut til Salmon Eye utanfor Snilstveitøy.
Salmon Eye skal med sitt unike design vera eit ikon og samtidig by på ei spennande og lærerik oppleving for dei som besøkjer senteret. Eit symbol for berekraftig matproduksjon i sjø.
Her skal dei besøkjande både lære, delta aktivt og få anledning til å kome med sine idéar til korleis me saman kan gjere matproduksjon i sjø endå meir berekraftig. Målet med alt som skal skje på Salmon Eye er å inspirere, informere og forbetre. Du kan lese meir på www.salmoneye.no
Velkomne til oss!
5
Me har produsert kvalitetsfisk sidan 1970. Årleg produserer me over 60 millionar laksemiddagar. Samspel mellom eigarskap, ansvar og drift har alltid vore viktig for Eide og dette er grunnlaget for nærleiken bedrifta har til produktet sitt og lokalsamfunnet rundt. Me vil vera med på å forma morgondagens havbruk på ein best mogleg måte, slik at komande generasjonar både kan hausta og eta sunn kvalitetsfisk frå Eide.
All fisken me produserer er Global GAP sertifisert, noko som mellom anna inneber strenge krav til sporing og mattryggleik. Eide er òg sertifiserte som karbonnøytral bedrift og me kan tilby sertifisert karbonnøytral laks, der alle karbonavtrykka i verdikjeda til produktet er kompensert for. Me produserer òg økologisk laks, sertifisert etter EU sin økologistandard av Debio. Kvardagen vår er eit kontinuerleg arbeid for betre kvalitet. Det handlar om å ha fagleg flinke og lokalt forankra tilsette som alle har same mål: Å produsera laksefisk av høgaste kvalitet. All fisken vår har òg eit høgt innhald av Omega-3 og er sjølvsagt produsert utan verken antibiotika, tilsette hormon eller GMO-råvarer.
Den økologiske laksen vår er klekka i vårt eige klekkjeri ved Skogseidvatnet. Her vert den tatt godt vare på av Frøydis og dei andre tilsette i KJ Eide. Etter eit opphald hjå Svein og Frode på setjefiskanlegget Lialaks i det vakre øysamfunnet Solund er fisken klar for sjøen. Då står røktarteamet vårt klar til å ta i mot den ved eit av våre økologisk sertifiserte sjøanlegg, der den får ekstra god plass og eige økologisk fôr.
Fjordauren vår produserer me i Osterfjorden. Osterfjorden har spesielt gode forhold for produksjon av aure, og har i mange år vert heimstad for aureproduksjonen vår. Her får den godt stell hjå driftsleiar Stein Inge og teamet hans. Aure er ein laksefisk som har mykje til felles med den atlantiske laksen, og mange synes at auren smakar endå betre enn laksen!
I tillegg til økologisk laks og aure kan Eide også tilby sertifisert karbonnøytral laks. All laks frå Eide har eit lågt karbonavtrykk, og me har gjort mange tiltak for å redusere avtrykka, noko du kan lese om i denne rapporten. For den karbonnøytrale laksen har me i tillegg kompensert for alle dei resterande karbonutsleppa i verdikjeda til fisken, inkludert fôret som står for den største delen av utsleppa.
6
Eg bryr meg om havet og tek vare på det, slik havet tek vare på meg. Det er vårt mantra i Mamasea. Havet dekkjer 71 % av jordas overflate og inneheldt magiske og intrikate økosystem som hjelp heile planeten til å trivast. Faktisk så er kvar einaste organisme avhengig av havet for å overleva. Difor meiner me det er på tide å tenkja nytt og endra måten me forheldt oss til havet!
Mamasea er her for å hjelpe oss med denne omstillinga av tankesettet. Gjennom radikal openheit og ei progressiv tilnærming skal me forandra industrien, utvida grensene for kva som er mogeleg og opne opp dei enorme mogelegheitene for framtidas havbruk. Utforsk det saman med dine næraste, la deg inspirere og nyt augeblikka til det fulle og vit at med Mamasea er det ikkje gjort nokon kompromiss. Me vil:
INSPIRERE til eit endra tankesett der havet er anerkjent og respektert som vår viktigaste kjelde til neste generasjon sunn og berekraftig mat.
LÆRE dagens og framtidige generasjonar av konsumentar og kokkar korleis me lagar fersk, naturleg og sunn mat i havet på naturen sine premissar.
FORBETRE dagens praksis og setje ein ny standard for framtidas havbruk.
Me i Eide har starta Mamasea fordi me har forplikta oss til å leie ei rørsle som skal redefinere korleis me dyrkar og produserer sunn, naturleg og næringsrik mat på naturen sine premissar. Neste generasjon sjømat.
Mamasea skal være ei rekkje sjømatprodukt laga utan kompromiss. Frå havet. For framtida. Me vil starta med laksen frå Eide og tilbyr no dei fyrste Mamasea produkta, avgrensa volum tilgjengeleg berre for nøye utvalde kundar.
All fisk som Eide produserer har et lågt klimaavtrykk, er produserte utan GMO og antibiotika, utan kopparimpregnerte nøter, og med landstraum på anlegga. Med Mamasea går me endå lenger. Alle Mamasea produkta er sertifisert karbonnøytrale ved at me kompenserer for alle utsleppa i verdikjeda. I tillegg har me endå strengare kvalitetskrav – berre dei aller beste fiskane får bli Mamasea.
Lyst til å lese meir? Du finn detaljert informasjon om vårt karbonavtrykk og korleis me sertifiserer fisken som karbonnøytral i avsnittet om karbonavtrykk eller i vårt klimarekneskap. På mamasea.com kan du lese meir om produkta våre.
Lyst til å sjå korleis me gjer det? Kom å besøk oss på Salmon Eye visningssenter i Rosendal og ta del i rørsla sjølv!
