Vår visjon er å sette standarden for framtidas havbruk. Som eit familieeigd selskap med lang historie er det viktig for oss å drive på ein måte som gjev oss anledning til å drive langsiktig, slik at me kan vidareføre familiebedrifta til neste generasjon i endå betre stand enn då me overtok.

Eide Fjordbruk er ikkje blant dei største og kan ikkje vinne på volum, men me kan strekke oss for å bli best på mange andre område. Vår visjon handlar om dette. Me vil gå i front og vere eit eksempel for etterfølging. Me vil produsere mat i sjøen på ein berekraftig måte for framtida og kommande generasjonar. Me bryr oss om kvarandre, fisken vår, og miljøet me driv og lever i.

Me er òg veldig klare på at me trur framtida for laks i Noreg er i sjøen, og at det er fjordane våre og det reine vatnet vårt som er vårt viktigaste fortrinn i konkurransen med pengesterke aktørar i utlandet.

Samtidig tek me utfordringane med dagens opne merdar på alvor, og innser at me treng nye løysingar for å få bukt med særleg utfordringa knytt til lakselus. Derfor vil me investere i å vidareutvikle dagens driftsform i sjø gjennom bruk av mellom anna ny teknologi og nye hjelpemiddel.

Eide nyttar GRI Standards core option for frivillig rapportering på berekraft. Standarden omfattar både den økonomiske, miljømessige og sosiale dimensjonen av berekraft knytt til eit selskap sine aktivitetar og produkt.

Denne rapporten er Eide sin første rapport etter GRI Core. Etter vårt syn er rapporten i det aller vesentlegaste konsistent med GRI sine rapporteringsprinsipp.

GRI Standarden er delt i generelle og spesifikke rapporteringskrav. Dei generelle krava gjeld for alle selskap, medan dei spesifikke krava vert valde ut basert på kor vesentlege emna er.

Vår GRI indeks-tabell er inkludert i denne rapporten og inneheldt referansar til kvar i rapporten eller på nettsidene våre ein kan finne informasjon om dei ulike GRI krava. Indeksen inneheld og opplysningar om eventuelle utelatne opplysningar, og årsaka til at opplysningane er utelatne. Alle referansar til sidetal viser til denne rapporten.

‍

Første generasjon lakseoppdrettar

Knut Johan Eide var major i forsvaret og gjekk under kallenamnet «Majoren». Det var lang veg å pendle frå Hålandsdalen til forsvaret i Bergen. Ynskje om å finne noko å leva av nærare heimen
var difor sterkt. Jorda var derimot skrinn, så etter fleire mislukka forsøk starta Knut Johan Eide med oppdrett av regnbogeaure i Skogseidvatnet i 1971. Seinare gjekk han over til å produsere laksesmolt i vatnet, ei verksemd som framleis heldt fram den dag i dag. Hovudkontoret til Eide ligg òg ved Skogseidvatnet i dag.

Andre generasjon lakseoppdrettar

Son til Knut Johan, Knut Frode Eide, hadde ei lovande karriere i oljenæringa, men sa opp stillinga for å satse på laks i 1984. Med dobbel arbeidsmengd og halv løn var det få som forstod valet, men Knut Frode såg tidleg potensialet i oppdrettsverksemda.

I 1988 pantsette Knut Frode huset for å få på plass finansiering til å starte med oppdrett av laks i sjø i Hardangerfjorden. Saman med kona Randi Eide utvikla Knut Frode selskapet til å bli ei solid bedrift med åtte sjølokalitetar. Eide Fjordbruk var ein stor del av livet til Knut Frode, så når han i 2018 måtte gje tapt etter åtte års kamp mot hjernekreft var det eit stort tap for både familien, verksemda og dei tilsette.

‍

Tredje generasjon lakseoppdrettar

Sondre Eide overtok stafettpinnen etter Knut Frode og styrer i dag verksemda vidare i Knut Frode si ånd, mot framtida. Der Knut Frode tok verksemda frå vatnet til sjøen, tek Sondre verksemda vidare ut i verda og opp i skya med spanande satsingar på stordata og analyse, visningssenteret Salmon Eye og eigen merkevare med karbonnøytral laks.

Med seg på laget er og resten av Eide familien. Erlend Eide, bror til Sondre, er teknisk sjef og leiar for FoU i verksemda, medan mor Randi Eide er kontorleiar og styreleiar og kona Jennifer Eide har stillinga som analysesjef.

‍

Verdikjeda

Verdikjeda vår startar med kjøp av rogn som vert klekka i vårt eige klekkjeri i Eidestøa ved Skogseidvatnet. Val av riktig genetikk er avgjerande.

To månader etter klekking startar fôringa på setjefiskanlegget. I denne fasen lever fisken i ferskvatn i kar på land. Her er det kritisk med god kontroll på vassmiljøet og fisken vært kontinuerleg overvaka. Me vel fôr av høy kvalitet for å gje fisken dei beste forutsetningane og vaksinerer fisken mot kjente fiskesjukdommar.

Etter 8 til 14 månader vert yngelen «smoltifisert». Dette er laksefisken sin måte å klargjere seg for eit liv i sjøvatn. Ein kan sjå den fysiologiske forandringa ved at fisken vert blank og dei karakteristiske parrmerka frå yngelstadiet forsvinn.

Med godt stell og fôr i sjøanlegga veks fisken seg slakteklar i løpet av eit år. Fisken vert deretter slakta anten i ein slaktebåt eller på eit lokalt slakteri, før den ender opp i marknaden og i fiskediskar verda over.

Våre leverandørar

For å lukkast med å produsere den beste fisken er det avgjerande å ha det beste utgangspunktet. Det sikrar ein gjennom å ta riktige val av rogn, vaksiner og fôr, tre sentrale innsatsfaktorar som me kjøper av eksterne leverandørar. Me har kontinuerleg dialog med leverandørane for å heile tida sikre at me ligg i forkant. Leverandørane av rogn, vaksiner og fôr er stort sett store selskap med produksjon i fleire land. Samla står desse tre kostnadsgruppene for om lag 50 % av våre kostnadar.

Den andre halvparten av kostnadane våre er fordelt på ei lang rekkje av i all hovudsak lokale leverandørar. Både nøter, merdar, båtar, arbeidsklede, dykke- og ROV tenester, fraktetenester og slaktetenester vert leverte av lokale selskap i regionen.

Konsernselskapa

Alle selskapa i Eide-konsernet er norske aksjeselskap. Morselskapet i Eide-konsernet er Eide Fjordbruk Holding AS. Eide-konsernet er kontrollert av Eide-familien.

Den kommersielle lakseproduksjonen i sjø skjer i Eide Fjordbruk AS, medan FoU-produksjonen skjer gjennom Norforsk AS. Settefiskproduksjonen i konsernet skjer i KJ Eide Fiskeoppdrett AS og Lialaks AS. Salmon Eye AS skal drifte konsernet sitt visningssenter Salmon Eye. Eide Sustainable Marine Technology er eit reindyrka FoU-selskap som satsar på utvikling av ny oppdrettsteknologi.

Denne rapporten omfattar alle konsernselskapa, men dei fleste vesentlege emna er berre knytt til oppdrettsverksemda i Eide Fjordbruk AS og Norforsk AS.

Tilknytte selskap

Konsernet har i tillegg investeringar i ei rekke tilknytte selskap.

Hålandsdalen Utbygging AS og Skjelbreid Poiree er lokale investeringar innan eigedomsutvikling og drift.

Searis AS er eit norsk teknologi-selskap som driv med visualisering og analyse av stordata.

Ænes Inkubator AS er eit resirkuleringsanlegg for produksjon av stor smolt som er under oppføring saman med Lingalaks og Tombre Fiskeanlegg.

Sjømatstaden AS er eit utviklingsprosjekt i Nordfjord i lag med Kvernevikgruppa som satsar på produksjon av laks i lukka anlegg, og kommersialisering av nye artar.

Bruravik Utvikling AS er eit eigedomsselskap. Miljø- og Havbruk AS er eit selskap som driv med behandling mot lakselus.